الاسماعيليه تقاطع الدروس الخصوصيه

الاسماعيليه تقاطع الدروس الخصوصيه كتب /محمدعارف. الدكتورة/شهيرة عبداللة. تعرب عن رفضها التام الدروس الخصوصية وقد ايدها كثيرا من اولياء الامور والامهات بالاسماعيلية.
وقالت نحن ندمر عقول ابنائنا:
بقالنا سنين بننادي ونقول قاطعوا الدروس الخصوصيه والناس استمرت في الدروس .المقتدر مش فارقه معاه و التعبان ماديا قطع من قوته وقوت عياله و استمر في انه يعطي دروس لاولاده عشان مايبقاش اقل من اصحابه…والنتيجه؟ صفر
صفر في الابتكار و الابداع عند اولادنا.
صفر في الفهم و الادراك و اصبح اولادنا مبرمجين.
صفر حتي في الاخلاق لان مفيش فيها اي دروس ولا حتي في المدرسه.
صفر في شغل المدرسين في المدرسه.
صفر في عقول المدرسين وابتكاراتهم من اجل الطلاب.
صفر في قيام الاب والام بدورهم في تعليم وتنشئه ابنائهم .
صفر في الفلوس في جيب كل اسره دافعه كل اللي وراها واللي قدامها عشان الدروس الخصوصيه.عشان حشو عقول اولادها وبس.عشان اولادها ياخدوا اعمال السنه وخلاص. عشان اولادها ينجحوا حتي لو مابيعرفوش يكتبوا اسمهم.
هل هتستمروا في دفع الاموال الطائله من اجل هذا الصفر؟
الدروس الخصوصيه علمت بعض المدرسين البلطجه داخل الفصول.علمت اولادنا البلاده و التنبله.علمت اولادنا يحفظوا بدون فهم.علمت اولادنا الرشوه لان الدروس اصبحت رشوه لمدرس الفصل عشان ينجح الاولاد.علمتهم يتفننوا في اهدار وقتهم وعمرهم ويتبلدوا.
علمت اولادنا كل السلبيات.
ارجوكم كفااايه.كفايه تنجحوا اولادكم برشوه الدروس الخصوصيه في سنين النقل.وتبرمجوهم وتقتلوا الابداع فيهم في الثانويه العامه بالحفظ و المراجعه ليله الامتحان واللي فيها الاسئله.
من ناحيه تانيه اسعار الدروس هتتضاعف ….يعني مفيش درس بخمسين وستين جنيه للاطفال،هيبقي ب ١٠٠و١٢٠ وطلاب الثانويه العامه اللي كانو بيدفعوا ١٨٠ او حتي ١٢٠هيدفعوا الضعف يعني اي درس هيعدي ٢٥٠جنيه كل ٨ساعات.ده غير تاكسيات رايح حاي يعني ١٦مره في ٨حصص في ٨ جنيه تاكسي = ١٢٨جنيه زياده مواصلات يعني بحسبه بسيطه الماده الواحده تقف ب ٢٥٠+١٢٨تاكسيات= ٣٧٨في ٨حصص بس و الشهر الواحد الطالب بياخد اكتر من ٨ حصص.يعني مش هنبالغ،هنزود بس ٥٠ جنيه كمان، يعني الماده الواحده هتقف ب ٤٣٠جنيه ده غير انك هتدي ابنك مصروف ياكل او يشرب حاجه.
هل تملك ٤٣٠جنيه *٦مواد كل شهر ؟
هل هتترك بعض المدرسين الذين لا يراعوا الله في شرحهم يستمروا في ذلك؟
هل هتترك ابنك لعدم الفهم و الابتكار وتجعل منه ٱله؟
هل هتفضل سلبي وترمي المسئوليه علي غيرك ومش هتاخد خطوه ايجابيه.

#لا لمافيا الدروس الخصوصيه
#لا لقتل الابتكار والتفكير
#خليك ايجابي وذاكر لابنك وتابعه
#الاسماعيليه تقاطع الدروس الخصوصيه
#مصر تقاطع الدروس الخصوصيه