معادنا اليوم مع حكاية تلاتة مصريين. _ نوبي وقبطي وعرباوي

معادنا اليوم مع حكاية تلاتة مصريين.
_ نوبي وقبطي وعرباوي

– العسكري إللي ع الشمال ده إسمه أحمد ادريس .. مصري من أصل نوبي .. الراجل ده كان صاحب فكرة إن الشفرة المصرية أثناء حرب التحرير تكون قايمة علي لهجة معينة في اللغة النوبية ملهاش أبجدية مكتوبة فبالتالي تكون سرية والعدو الإسرائيلي مايعرفش يوصل لها .. ولو عاوز تعرف أهمية الشفرة في إتصالات الجيش وأهمية إستخدام لغة منطوقة وغير مكتوبة وأهمية ده في النصر ممكن تشوف فيلم لنيكولاس كيدج إسمه Wind Talkers وحتفهم قصدي.

– الظابط إللي في النص ده إسمه باقي زكي يوسف .. مصري قبطي .. الراجل ده كان صاحب فكرة عبقرية وهي ” إستخدام مشكلة لحل مشكلة تانية ” .. زي ما قريت بالظبط .. كان قدّام الجيش المصري مشكلتين للعبور لسينا : مانع مائي ( مية قناة السويس ) ومانع ترابي ( خط بارليف ) .. الظابط الصغير ده فكّر إنه يرفع ميّة قناة السويس بطلمبات ضغط عالي ويزيل بيها رملة خط بارليف .. وده خلّي الجيش المصري بعساكره ومعداته التقيلة يوصل لسينا في أقل وقت ( 6 ساعات ) .. وأهمية ده أنه شل تفكير العدو الإسرائيلي وقلل من الخساير جدا .. وده إللي الحلفا بجلالة قدرهم ( إنجلترا وأمريكا وكندا ) معرفوش يعملوه لما حاولوا ينزلوا علي شواطئ فرنسا لتحرير أوروبا من النازي و الخساير كانت في اللمون لحد ما سيطروا علي الشاطئ .. عاوز تفهم قصدي أتفرج علي المشاهد الأولي من فيلم Saving private Ryan

– الجنرال إللي ع اليمين ده إسمه محمد عبد الحليم أبو غزالة .. مصري من أصول عرباوية من قبايل أولاد علي إللي موجودة علي طول الساحل الشمالي لحد ليبيا .. الراجل دة كان مايسترو مدفعية الجيش المصري في حرب أكتوبر .. هو إللي خلي عبور الجيش المصري ممكن بمهارته في قيادة مدفعية الجيش التاني لدك تحصينات وأسلحة العدو المضادة في خط بارليف .. وبعد كده كان ليه بطولات ( معظمها سرية لحد دلوقتي ) في تسليح الجيش المصري لما مسك قيادة الجيش المصري.
– التلاتة دول ساهموا مع غيرهم بتغيير علوم إستراتيجية الحروب في الشرق الأوسط والعالم كله.
– أنا أخترت التلاتة دول عشان أبيّن أن ثراء مصر الحقيقي وعبقريتها في تنوّعها ..
– حرب أكتوبر إللي اتطلب فيها من آباءنا إنهم يعدوا قناة فيها نابالم زي جهنم إسمها قناة السويس ، ويطلعوا حيطة طولها 22 متر بزاوية قايمة إسمها خط بارليف وهما شايلين أسلحتهم كاملة في عز الضهر ، عشان بعد كده في الصحرا يقابلوا جيش متسلح من أمريكا و يهزموه … و قالوا آمين.
في ست ساعات 👌