السيد الرئيس عبد الفتاح السيسى  رئيس الجمهوريه

الـسـيـد/ عـبـد الـفـتـــاح الـسـيـسـي رئـيـس الـجـمـهـوريـة

بقلم خالد الوزير

كـلـمـة مـن مـواطـن مـصـرى.وبدون خوف ولازعل اسمعنى ياريس ارجوك احنا تعبنا ومحدش بيدفع التمن غيرنا احنا الشعب الغلبان المطحون علشان لقمة العيش …………… خدها منى نصيحه صريحه
1- سيبك من شماعة الإخوان دلوقتى
2- أمنع استيراد أكل القطط والكلاب والشوكلاتات وبنس الشعر والشيبسى والجبنه والمكرونات الملونه وسجاجيد الصلاه والبراويز والشمع وكل الحاجات اللى مش هنموت من غيرها وشوف هتوفر دولارات أد ايه
3- امسك الكتب الخارجيه وأعمل كتب الوزاره زيها وامنع طباعة الكتب الخارجيه.. هترحم الأهالى وهتوفر مليارات
4- عندنا استعداد جميعا نستغنى عن البراندات ونلبس خيش ونمسك شنط خضار وجزم من باتا .. ولما تعطش السوق هتلاقى المصانع المصريه للبس والجلود هتشتغل وشغل نضيف كمان .. مفيهاش حاجه منبقاش كلاسى وستايلش أربع خمس سنين عشان خاطر بلدنا
5- امنع الحياه السياسه بالدراع عن كل ابن كلب حرامى وحزب وطنى من ايام مبارك ومعلش تعالى على نفسك وكن ديكتاتوريا فى النقطه دى بالذات
6- اقاله جميع اللواءات اللى ماسكين كل خرم ابره فى الدوله كفايه عليهم شغل كده يستريحوا شويه بقى ويلعبوا مع أحفادهم وعين كفاءات
7- معاش مبكر لكل رؤساء الاحياء والمناصب الكبيره وعين شباب معروف عنهم الشرف اكيد هتلاقى حبه شرفاء لسه موجودين فى البلد يعنى.
8- اى فلوس تبرعات تجمعها لأى صندوق تعمل بيها مشروع حى قدام عنينا أول بأول نشوفه
9- اوقف نزيف الملايين اللى بيلهفها استشارى المصالح الحكوميه اللى عاوز يشور علينا ببلاش يتفضل واللى مش عاوز يتنيل يقعد فى بيتهم كده كده شورتهم بتبقى سوده
10- اقفل كل قنوات العهر والرقص وإعلانات الجنس والشعوذه الوسخه لو عاوز تقبض على أصحابها بتهمه النصب او نشر الفسوق هتعرف توصلهم كويس.
11- أجمع أصحاب شركات الإنتاج السينمائي والفنى مع السيناريستات والمؤلفين والموسيقين المحترمين وحطوا خطه للنهوض بالفن والذوق العام.. ودى أهم نقطه يمكن أهم من قناه السويس بالتفريعه بتاعتها
12- عين وزير ثقافه مثقف.
13- الجيش ما يدخلش البلد يمسح ميه ولا يسلك بلاعات ولا يكرع العيال الصغيره بعد ما تأكل! الجيش فى ثكناته والحاجات دى ليها ناسها بس انت اختارهم صح
14- الوزير الفاشل يخرج منها بمرتب آخر منصب قبل الوزاره
15- اطلب من كل رجل أعمال إنشاء مصنعين فى محافظتين مختلفين مقابل الارض والاعفاء ضريبى واعلانات مجانيه
16- اللى يسرق يتحاسب واللى يتسبب فى كوارث إهمال يتحاسب
17- هات 2؛ 3 شباب متخصصين ودارسين فى كل قطاع من قطاعات الدوله وياحبذا يكونوا معارضين .. هتسمع منهم اقتراحات وحلول سحريه للنهوض بالقطاع عشان موضوع الدهن فى العتاقى دة فى الفراخ والبط بس مش فى الكفاءات البشرية