الروسيه تكسب 1 ” كتبت /د /ابتسام الوكيل

الروسيه تكسب 1 ” كتبت /د /ابتسام الوكيل
ماكانتش أول مره اسمع الكلام ده …ولا أول مره حد يسألنى .. حتى إن كان السؤال صاحبه مجاوب عليه مقدما !!
كان حوار طويل وأنا بحاول أقنعه إنه يصلح نفسه ويهتم بزوجته ويغير من أسلوبه معاها …..وانتهى انه يقولى (( أصل أنا كده كده هأتجوز يا دكتوره )) !!!!
رديت بسرعه …آآآآآآه أنت شكلك شايفلك شوفه خلاص!
قالى (( بصراحه آه بس مش مصريه ))
قلتله ايه ؟؟ ليه ؟؟؟
كان الرد اللى مش غريب عليا ولا على سمعى …. روسيه !!!
رديت ..تمام …وقعت واقف حضرتك
رد عليا وقاللى (( الست المصريه متعبه ..مهر وجهاز وشبكه وقايمه … ولو لا قدر الله حصل مشاكل مؤخر ونفقه والشقه .. آه الروسيه أو الأجنبيه عموما مالهاش غير ابنها …حتى لو مش معاها الباسبور بتاعها تاخد إبنها وتطلع على سفارتها وتطلع باسبور غيره وعلى بلدها مش بتدور على أى حاجه وراها …بس المصريه مش كده ))
كان نفسى أقوله وفى من الأجنبيات اللى مش بتدور حتى على إبنها _ بس أكيد مش كلهم طبعا _ وفضلت السكوت
قلت أكيد علشان أنت كنت عاوز تسافر …قالى (( لا هى بتقول إنها هتيجى تعيش فى مصر عادى وأدينا هنشوف !))
رديت عداك العيب والله … طيب والديانه …
(( كاثوليكيه ….وقلتلها أولادى مش هيكونوا غير مسلمين وعموما ادينا هنشوف …أنا هأخسر إيه يعنى ؟؟؟ ))
طيب والمدام ….
(( هى كده كده أنا معرفها من زمان إنى هأتجوز بس هى مش متخيله إنى أنفذ كلامى وفكرانى بهزر ))
طيب أنت تعرف الست الروسيه دى يعنى متأكد منها ومن أخلاقها
(( على أد ما عرفتها من النت ..وعموم خلينا نشوف … أنا مش خسران حاجه )) !!!!!!!!!!!!!!!!!!!!!!!!!!!!!!!!!!!!!!!!
بس بالله عليكى يا دكتوره مش أريح وأحسن من المصريه ؟؟؟؟؟؟
وزى ما بدأت كلامى ..مش أول مره أسمع الكلام ده
وبالذات الروسيه …إنها ست جميله وكيوت وبتعرف تقدر قيمة جوزها لا والحجم لا يشغل حيز كبير من الفراغ ….
كملت أنا بقى وقلت… وعلى فكره حضرتك بتعمر وعايزه تعيش …..
قاللى أه عرفتى منين …. كنت عاوزه أقوله كتر البكى يعلم النواح !….بس سكت علشان مايكونش تشجيع مباشر ليه وإنه يحس إن تفكيره عادى وان هم السابقون هو اللاحقون !!!
قلبى عليكى يا ست يا مصريه
أما يجى الراجل يتقدم لها يسأل عنها كل اللى شافوها واللى حتى سمعوا عنها لحد زمايلها اللى كانوا معاها فى إبتدائى … ولو كانت إرتبطت قبل كده يسيبها !
لو والدها طلباته قليله يبقى بيرميها وعاوز يجوزها وخلاص !
ولو طلباته كتيره يبقى مفترى ومبالغ وعاوز بنته تقعد جنبه !
لكن الروسيه ملهاش طلبات خاااااااااااااااااالص
لو حصل مشاكل (( لا قدر الله )) ..أول حاجه يهددها الرجل ويقولها مش هخليكى تشوفى ابنك تانى
لكن الروسيه هتاخد ابنها وتمشى (( على فكره ده ابنك بردو ))
أقول إيه ولا إيه …
الراجل ده راجل محترم …. ومثقف ..وواعى جدااا …
أنا أحترمه وأحترم تفكيره وأتقبله طبعا ..وكلامى ده مش أكتر من عرض أفكار … لأنى لا أملك ولا أريد أن أنتقده بالتأكيد
الموضوع وما فيه أنه هو نفس الراجل ده وغيره لو فكر يتجوز مصريه هيفكر بشكل مختلف تماما !!!!
وتتعدد مميزات الروسيه من حديث لآخر ..لتصل المقارنه فى إحدى الأستشارات الشخصيه لرجل مش عاوز يتجوز مصريه بعد أن وقع الطلاق بين وبين زوجته الأولى بسبب والدتها إن الست المصريه ست تسد النفس ومش بتعرف تسعد زوجها وإن زميله لما إتجوز روسيه كان سعيد جدااا جدااا …. تقريبا الروسيه مالهاش أم !!!
جرالك إيه يا مصر ؟؟ وإيه اللى حصل لشبابك ؟؟ وبناتك كمان ؟؟؟… معايير تختلف وقيم تفصيل ومعتقدات حبه فوق وحبه تحت للأسف …
وعلى فكره و بصراحه لو أنا مكانه وبفكر بطريقته وفى مقارنه بسيطه بين إن هو أو غيره يفكر يتجوز من مصريه أو أجنبيه و تحديدا الروسيه ….إسمحولى أقوله وأقولكم
(( الروسيه تكسب ))
د.إبتسام الوكيل