علمونا_في_الطب_النفسي

كتب : د/ عصام الخواجه

عزيزتي المرأة :
نحن الرجال نعاني من بعض المشاكل في أمخاخنا وطريقة تفكيرنا وهناك أشياء مهمة جداً لابد ان تعرفيها جيداً عنا لان هناك سوء تفاهم كبير ومزمن بيننا في بعض الأمور:

١- نحن الرجال عندنا حاجة اسمها “نعم” وحاجة اسمها “لا” وحاجة اسمها “مش متأكد او مش عارف” (ومش متأكد دي مابنستعملهاش كتير ومابنحبهاش أبداً)

٢- لايمكن بأي حال من الأحوال عندنا ان تجتمع “نعم ولا” في نفس الوقت (أمخاخنا ناقصة فيها الحتة دي معلهشي)

٣- أمخاخنا برضه مابتفهمشي العملية المعقدة بتاعة ان “نعم” ممكن تبقي “لا” وان “لا” ممكن برضه تبقي “نعم” (هو تخلف عقلي أنا عارف فاستحملينا)

٤-إحنا مابنفهمهاش وهي طايرة (والله العظيم مابنعرفش نفهمها وهي طايرة ولا وهيه ماشية حتي مش غلاسة ولا حاجة) فلازم تفهمي النقطة دي كويس علشان ماتظلميناش.

٥- التفاصيل عندنا مش مهمة قوي وساعات التفاصيل بيتضايقنا كتير…. فالأحمر والبمبة والخوخي الپيتش والموڤ عندنا كلهم حاجة واحدة (اهو كله احمر وخلاص)…. فعاملينا علي قد عقلنا ودوري علي ال bigger picture معلهشي (ضعف عقلي شديد بعيد عنك مالوش حل).

٦- إحنا بننسي كتير ومش معني النسيان ان احنا مش مهتمين أبدا والله…. فمتكبريش الموضوع قوي لما ننسي اعتبريه تخلف عقلي او الزهايمر وعديها وفوتي علشان خاطري ستكونين اكثر سعادة.

٧- السكوت مش علامة الرضا ولاعلامة الغضب ولا علامة اي حاجة خالص…. السكوت ده آكتر حاجة بتلخبطنا ومابنفهمشي ايه معناه فقولي حاجة (اي حاجة) الهي يسترها معاكي ومعانا يارب.

٨-استعمال الجنس كثواب وعقاب اكبر غلطه تعمليها… استعملي اي حاجة تانية الا ده…. احنا حساسين قوي للموضوع ده خدي بالك.

٩-احنا ساعات بنبقي محتاجينك آكتر مماتتصوري بكثير ولعلمك لحظات الغضب ربما تكون أقصي درجات احتياجنا لك (وانا عارف انك عندك نفس المشكلة المهببة دي) هو غباء متبادل بعيد عنك.

١٠- أبوس إيدك ماتدخليش اي طرف تالت في المواضيع…. الحوار المباشر أفضل وسيلة لحل المشاكل بس لازم تعرفي ان مخنا بيشتغل بطريقة مختلفة شوية وتحتاج بعض الصبر ولما العملية تعك معاكي جامد ياريت تراجعي البوست ده كل شوية….!!!