الحلم كفن

الحلم كفن

بقلم / اسلام عزت هلال

بتبيع أحلامك ف الطرقات
طب مين يشتري منك أحلام
وان مره لقيت هتبيعها بكام
كل الأحلام صبحت ببلاش
دلوقت الأحلام ما بتسواش
فوق الرصفان أحلام بالكوم
تحت الرصفان أحلام بالكوم
غطاها تراب أحزان وهموم
غطتها دموع كل الأيام
حلمك تحرير ؟
حلمك بوطن ؟
إزاي والبير ف الحلم عطن
ميته مليانه ديدان وعفن
إعطش واتحمل وما تشربش
أو إشرب موت والحلم كفن
طول م المخاليق لبسه الأراجوز
طول م الأيام ضربالك بوز
إرميها وقول ع الدنيا سلام
بتبيع أحلامك ف الطرقات
طب مين يشتري منك أحلام
فعلا مجنون ….
متعبي هموم …..
بتحاول تلقي خلاص للكون
البر حسوم …..
والبحر حسوم ….
مركب أحلامك ضد العوم
من عهد أمون ولحد الأن
إنت المسجون وانت السجان
ف سنين العمر تفوق كام يوم
وبقيت العمر تخاف وتنام
السم زُعاف وانت المسموم
إزاي مسموم راح يبقي إمام
بتبيع أحلامك ف الطرقات
طب دوّر علي حبة مجانين
يمكن .. يشتروا منك أحلام